نبداو من الأول و نعرفو بعدا واش كاينا كورونا جديدة أو لا؟
ماكايناش كورونا جديدة، هو نفس الفيروس ديال سارس كوف2، كيما الإنسان و جميع المخلوقات لخلقها الله سبحانه و تعالى تبدلات من نهار كانت ليومنا هذا و كيما البكتيريا كتبدل باش تقاوم الأنتيبيوتيك حتى الفيروسات بعد الانتقال ديالها من واحد لواحد لابدا أن يبان فيها تغييرات قليلة فالوراثة ديالها كيما ان ولادك ماشي كوبي كولي ديالك غير كيشبهولك بزاف أو شويا كذلك باقي المخلوقات و كذلك الفيروسات.
اذن الفيروس لي قالوا جديد فبريطانيا و دول أوروبية أخرى و كذلك في أستراليا هو طفرة، أي تغير بسيط في الوراثة على الفيروس الأول و لكنه باقي هو كورونا 2019.
اذن فين كاين الخطر دابا؟ أو واش اللقاح ديال المغرب باقي صالح؟
الخطر هو أنه خاصنا نتسناو ايبانو المعلومات الموثوقة على هاذ النوع باش نعرفو نتعاملو معاه أو صراحة المغرب خذا القرارات الصحيحة و لي زوين الناس راه خدامة ليل و نهار و آخر تقرير خرج من مختبر البيوتكنولوجي ديال البروفيسور الإبراهيمي في كلية الطب و الصيدلة بالرباط من بعد ما حلل علميا هاذ النوع ليبان فبريطانيا قال بأن الطفرة لي ظهرت عليه مكاتغيرش من الشكل ديالو الخارجي و السوارت لكيدخل بيهم للجسم.
هادش كيؤكد لينا بأن اللقاح لغيديرو المغاربة تبارك الله عليهم باقي صالح أو مزيان عكس اللقاحات لختارو دول أخرى أو لي تقدر تكون الفعالية ديالها ناقصة.
إوا إلا بانت شي حاجة جديدة و مابقاش اللقاح صالح شنو غنديرو؟
باش تكون الأمور واضحة خاص تعرفو بأن هادشي ديال الطفرات معروف فالفيروسات التنفسية و خا ماشي كلهم من نفس العائلة ولكن ماشي شي حاجة جديدة على الناس دال الدومين ديال الصيدلة و الصحة عامة و كيتعاملو معاه كلا عام.
كمثال الفاكسان ديال الرواح راه فيه 3 ديال الأنواع ماشي واحد باش ليجاك ايقضي فيه او هاذ العام فاش الدراسات بينت بأن كاين واحد جديد زادو نوع رابع فيه ... الفاكسان ديال الرواح راه كيتبدل كلا عام أسيادنا حسب أنواع الرواح ليدازو العام لقبل.
و كذلك و مثال، الخدمة الصعيبة هيا ليدارت دابا من بحوث و تطوير ديال اللقاح و دبا را خرج للاستعمال، و أي تغيير أو طفرة فهاذ الفيروس هي مسألة معروفة عند خبراء و مسؤولي الصيدلة و كتسمى، تغيير في الملف، لا غير و لي كيزيدو في الدوا او ينقصو فيه بحسب الحاجة و تطور الوضع بلا منحتاجو داك الوقت كلو لحتاجينا فالأول باش اخترعوا الفاكسان لأول مرة.
خلاصة القول أن اللقاح ديال دابا ضروري نديروه لأنه صالح للفيروس لكيدور دابا و لماغاديش امشي و إلا كاين شي تغيير لي خاص السلطات الصحية المسؤولة ديرو را غادي ديرو فالوقت ديالو بلا صداع بلا خلعة بلا روينة غير تهناو.
المواطن غير ارتاح المسؤولين تبارك الله بينوا أنه بقدرة الله قادرين على هادشي و كلا حاجة كادار فوقتها و بالطريقة الصحيحة ديالها.
و ماتنساوش الخلاصة، الفاكسان ديال دابا راه صالح و خاصو يدار!
الله احفظ الجميع!